◆Huzoor ﷺ Ki Rawangi

◆Huzoor ﷺ Ki Rawangi◆

 Iske Ba'd  Hazrat Jibra'eel  Ameen Alaihissalam Rahmatul-Lil-Aalameen ﷺ
Ko Khaana-E- Ka'abah Se Bathaa-E-
Makka Main Laaye Jaha  Par
Hazrat Maka'eel   , Hazrat Israfeel AlaihiMussalam Sattar-Hazaar(70,000) Malaayika -E- Kiraam Ki Jama'at Ke Sath Aapke Istaqbaal Ke Liye Safe Basta Khade  The Aur Jab Huzoor TaajDaare Ambiya ﷺ
Unke Darmiyaan Tashreef Legaye  , To Dil-Fareb Manzar Ye Tha...

● Tajalli-E- Haq Ka Sehra Sar Par , Salaat-o- Tasleem Ki Nichaawar
● Duroya Qudsi Pare Jama Kar , Khade Salaam Ke Waste The  

Malaayika  Ke Isi Jhurmat Main Aapko Sawaari Ke Liye Barraaq Pesh Kiya Gaya.
Huzoor Akram  ﷺ   Farmate Hain :

( Phir Hame Ek Aisi Sawaari Pesh Ki Gayi Jiska Qad Khacchar Ke Qad Se Chota Aur Ghade Ke Qad Se Bada Tha Aur Wo Safed Rang Ka Tha Aur Use Hi  Barraaq(Chamak-Daar, Bijli Ki  Tarah Tez Raftaar , Saaf Shaffaaf)  Kehte Hain.

 Phir Jab Huzoor ﷺ  Ko Us Burraaq Par Sawaar Hone Ke Liye Arz Kiya Gaya To Aap Ko  Ek Dam Apni Pyaari Ummat Ka Khayaal Aagya , To Aapne Ranjida Hokar Sawaar Hone Main Tawaqquf  Farmaya.

●Irshaade Khuda Wandi Huwa:
Ae___ Jibra'eel( Alaihissalam) Mere Mehboob ﷺ Se Ghum Ki Waja Daryaft Karo.

Hazrat Jibra'eel (Alaihissalam) Ne Arz Kiya :
Mehboob ﷺ  Aap Gamzada Kyun Hain?

To Aapne ﷺ  Farmaya : Jibra'eel  ! Aaj Mujhe Allah Ta'Aala Ki Taraf Se Tarah Tarah Ki Neamato'n Se Nawaza Gaya He.
 Nihayat Azmat -o- Shaan Ke Sath Arsh Par Bulane Ka Aehtamaam Kiya Gaya ,
Mere Liye Jannat-ul-Firdous Ke Malbosaat Aur Baheshte Bareen Ki Pur Waqaar Sawaari Bhejhi Gayi ,
Lekin Qayamat Ke Din  Meri Ummat Bhoki Pyaasi Aur Gunaho'n Ka Bojh Othaye Apni  Qabro Se Niklegi ,
To Pachaas-Hazaar(50,000) SaaLaa Qayamat Ke Din Pul Siraat Ka Bees-Hazaar(20,000)  Saal Ka  Aur Baal Se Bareek Aur Talwaar Se Tez  , Khathin Rasta Kis Tarah Tay Karegi?

Allah Tabarak-o- Ta'aala Ne Apne Mahboob ﷺ Ke Ghum Ki  Waja Suni ,
To  Irshaad  Farmaya: Ae__ Mahboob ﷺ
Aap Apne Qalbe Mutahhir Se Har Qism Ke Ranj -o- Ghum Ko Nikaal Dijiye ,
Jis Tarah Aaj Main Ne Aapko Azmat -o- Shaan Aur Rif'at -o- Sar-Bulandi Ata Karke Aapke Liye Buraaq Ki Sawaari Bhejhi He.
Isi Tarah Qayamat Ke Din Aapke Har Ummati Ke Liye Jiske Dil Main Apki Muhabbat Jalwa-Gar Hogi, Sawari Bhejh Di Jayegi , Chunancha Rabbe KaayeNaat Ka Farmaan Aali Hai:

يوم نحشو المتقين الى الرحمن و فدا.

[ Jis Din Ham ParhezGaaro'n Ko Rahmaan Ki Taraf Le Jayege Mehmaan Bana Kar ]
( Sure Maryam, Para-16, Aayat-85)


Zere Aayat Mufassireene Karaam Ne Likha He Ke Jab Ahle_Taqwa Ko Qabro'n Se Othaya Jaayega To Unke Liye Murassa -o- Muzaiyan Karke Noori  Sawaariyo'n Ko Allah Ta'Aala Ka Mahmaan Banane Ke Liye Bhejha  Jayega.
(Durre Manshoor, J:3, :-287 Maakhooz)


 Hazrat Maulana Na'eeMuddeen Muraad Aabaadi Aleh Rehma Is Aayate Muqaddasa Ke Tahat Ye Riwayat Naqal Karte Hain: Hazrat Ali RadiyAllahu Ta'aala Anhu Se Riwayat Hai Ke Momineen , Muttaqeen Mehshar Main Apni Apni Qabro'n  Se Sawaar Karke Othaye Jayege Aur Unki Sawaariyo'n Par Talaayi  Murassa Zaiye Aur Paalaan Honge.

*Behre Haal*  Jab Huzoor ﷺ  Buraaq Par Sawaar Farmane Lage , To Us Buraaq Ne BaarGaahe RisaaLat Ma'Aab Main Arz Kiya : Ya Rasool'Allah ﷺ ! Khuda Ka Shukr He Ke Aapne Mujhe Apni Sawaari Ke Liye Muntakhib Farmaya Aur Main Apni Is Khush Qismati Par Jis Qadar Bhi Naaz Karo Kam Hai ,
Magar  Ae___ Shabe Asraa Ke Dulha Kal Qayamat Ke Din Aaj Hi Ki Tarah Mujh Par Sawaari Farmana ,
Mere Aaqaa ﷺ ! Us Din Mujhe Faramoosh Na Farma Dena.
Rahmate  Du Aalam ﷺ  Ne Uski Ye Arz Manzoor Farmayi .
Aur Farmaya : Ae___ Barraaq Khush Hoja , Ham Qayamat Ke Din Tujh Par Hi Sawaari Karege.

TaajDaare Ambiya ﷺ  Barraaq Par Sawaar Huwe , Hazrat Jibra'eel Alaihissalam Ne Rakaab Thaami.
Hazrat Mekayeel Alaihissalam Ne Lagaam Pakdi.
Noori Farishte Haatho'n Main Noori Qandile'n Liye Safe Basta Saath Saath Chale Aur Yu Lagta Tha Ke Farsh Taa Arsh Anwaare Tajalliyaat Ki Barish Ho Rahi He.

●BAAGE AALAM MAIN BAADE BAHAARI CHALI ,
SARWARE AMBIYAA KI SAWAARI CHALI ......
 YE SAWAARI SOYE ZAATE BAARI CHALI ,
 ABRE RAHMAT OTHA AAJ KI RAAT HE ●


● JAZBE HUSNE TALAB HAR QADAM SAATH HE ,
 DAAYE BAAYE FARISHTO'N  KI BAARAAT HE .......
 SAR PE NURAANI SEHRE KI KYA BAAT HE ,
SHAAH DULHA BANA AAJ KI RAAT HE ●


● KON JATA HE? SULTAAN DUNYA-O-DEE(N) ,
KIS TARAF ARSH PAR ZAAT HAQ KE QAREE(N).....
LENE AAYE YE KON? RUHUL AMEE(N) ,
 KYA WISAALE KHUDA AAJ KI RAAT HE ●


● ITRE RAHMAT FARISHTE CHIDAKTE CHALE ,
JIS KI KHUSHBO SE RASTE MAHEKTE CHALE .......
 CHAAND TAARE JALO MAIN CHAMAKTE CHALE ,
KEH'KASHAA(N) ZERE-PAA AAJ KI RAAT HE ●

(📙Na'eemi Khutbaat, J-1,S-284 to 286)